Jólalegt vetrarævintýri
á Úlfarsfelli

Þriðjudaginn 20. desember tóku 42 Toppfarar jólalega göngu upp á Úlfarsfell...
 
...þar sem 15 ungir Toppfarar voru með í för; Arnbjörn Ingi 5 ára, Hilmir 6 ára, Katrín 8 ára, Arna 9 ára, Andri 10 ára, Hlín 11 ára, Sæmundur 11 ára, Anna Lilja 11 ára, Gunnar Jökull 11 ára, Kristófer 11 ára, Elísabet 12 ára, Garðar Örn 12 ára, Irma Gná 14 ára, Breki 14 ára og Gunnar 15 ára...

... tveir gestir; Jökull og Kristrún þeirra Gunnars Viðars og Maríu...

... og 24 hefðbundnir meðlimir; Anna Sigga, Árni E., Áslaug, Ásta Bjarney, Bára, Björn, Eyþór, Guðmundur Jón, Gunnar Viðar, Gnýr, Gylfi Þór, Heiðrún, Ingi, Jakob, Jóhanna Fríða, Jóngeir, Kjartan, Lilja Sesselja, María E., Óskar Wild, Rannveig, Steinunn, Sæmundur og Örn

... og hundarnir Día og Polli...

Gengið var í gegnum skóginn áður en snjóugar lendurnar tóku við
og var veðrið og færið með jólalegasta móti... hiti við frostmark, lygnt, ferskur snjór yfir öllu og stjörnubjart..

Þetta var fjórða skiptið sem við förum í þessa jólagöngu á Úlfarsfell og aldrei hefur jafn mikill snjór verið á leiðinni...
djúpir mjúkir skaflar og stundum harðnaðir klakar undir með harðfenni á köflum...

Þetta var vetrarævintýri eins og þau best gerist og allir nutu sín vel ólíkt sumum fyrri jóla-Úlfarsfells-göngum þar sem frostið hefur bitið fast eða vindurinn hrakið okkur niður eða göngufærið og hitastigið fremur minnt á sumarblíðu en vetur...

Að þessu sinni vorum við með allt á kafi í snjó eins og desember sæmir en milt veður... en við þessar frábæru aðstæður mátti hins vegar yngri kynslóðin minna vera að því að ganga upp á fjallið eins og fullorðna fólkiðnu
er tamt að gera því það var hægt að leika sér í snjónum alls staðar á leiðinni...

Katrín 8 ára hans Árna fór létt með þessa göngu eins og hinir ungu fjallamennirnir því haldið var vel áfram alla leið
þó flestir væru ekki vanir því að skóflast upp fjöll að vetri til í erfiðu færi...

Anna Lilja 10 ára hennar Lilju Sesselju sat fyrir í miðri brekkunni með borgina í baksýn og heila jólaseríu á höfðinu
eins og alvöru fyrirsæta...

Arnbjörn Ingi 5 ára afaogömmubarn þeirra Heiðrúnar og Inga var yngstur allra sem mættu
og gekk með atgeir eins og Ingi afi og Gunnar á Hlíðarenda...

Sæmundur 11 ára, Arna 9 ára og Hlín 11 ára eru orðnir ötulir göngumenn Toppfara sem mæta alltaf með Sæmundi frænda
og enda örugglega einn daginn á Hvannadalshnúk með honum...

Mynd frá Gylfa

Bræðurnir Andri 10 ára og Garðar 12 ára hans Gylfa eiga sér langa sögu í Toppförum
og hafa oft mætt með okkur í flottar göngur...

Irma Gná hans Jóngeirs hlaupara og listasmiðarins sem á heiðurinn af ljósmyndunum á bíl þjálfara
lét sig ekki vanta í gönguna en hún hefur tekið þátt í mörgum keppnishlaupum með Toppförum gegnum árin...

Gunnar Jökull 11 ára þeirra Rannveigar og Jakobs er fjallamaður af Guðs náð og nýtti kvöldið vel...

... með vini sínum Kristófer sem gaf félaga sínum ekkert eftir í ærslafullum leiðangri þeirra
um fjallið þvert og endilangt...

---**--

---- ath mynd af Breka og Gunnari----
 

Hilmir 6 ára þeirra Báru og Arnar gaf sig allan í leitinni að nammipoka jólasveinsins á tindinum...

Elísabet 12 ára þeirra Gunnars Viðars og Maríu fann nefnilega loksins nammipokann eftir ævintýralega leit um allt fjall
sem minnti á alvöru björgunarleiðangur því ljósgeislarnir dreifðust um fjallið hið efra meðan á leit stóð...

Upp úr pokanum sem virtist endalaust djúpur... fengu allir sleikibrjóstsykur og pez
sem jólasveinarnir höfðu falið fyrir ungu fjallamönnunum...

Eftir jóla-fjöldasöng var haldið niður þar sem sumir lentu í skríkjandi sleðafæri á botninum einum saman...

Vetrarævintýri af bestu gerð
upp á 3,1 km göngu á 1:44 klst. upp í 274 m hæð með 281 m hækkun alls.

**Gleðileg jól elsku Toppfarar**

P.s. Næsta æfing er árleg frá Lágafellslaug um Lágafell yfir á Lágafellshamra í Úlfarsfelli en án þjálfara þar sem þeir ætla norður í vetrarfrí milli hátíða... verið í bandi gegnum fésbókina ef einhverjir vilja hafa umsjón með þessari göngu eða bjóða upp á eitthvað annað fjall til að ganga á ;-)

Höfðingjaganga
við hörkuvetraraðstæður á Hnefa Lokufjalli

Höfðingjum til heiðurs göngum vér
á Hnefa í Lokufjalli
Upp hæstu fjöll, já hugsa sér
þeir hendast á léttu spjalli
Þjálfarar

Þriðjudaginn 13. desember heiðruðu Toppfarar aldursforseta klúbbsins með höfðingjagöngu á Hnefa í Lokufjalli í krefjandi veðri og snjóþungu færi þar sem vel blés á menn úr norðaustanátt en hiti var heldur meiri en verið hefur síðustu daga eða rétt yfir frostmarki... sem mönnum fannst bara sumum vera heitt...

Þetta voru þau: Anton, Auður, Ágústa, Árni E., Ásta Bjarney, Ásta Guðrún, Ástríður, Bára, Björgvin, Björn, Elsa Þ., Gerður Jens., Guðmundur Jón, Guðjón, Helga Bj., Hjölli, Ingi, Ísleifur, Jóhanna Fríða, hanna Steina, Jóhannes, Jón, Jóna, Katrín Kj., Ketill, Kjartan, Llja Bj., Lilja Kr., Ólafur, Rósa, Sigga Rósa, Sjoi, Soffía, Steinunn, Súsanna, Sæmundur, Vallý, Valgerúr, Willi og Örn.

Gengið var upp með brúnum Lokufjalls og ekkert gefið eftir fyrr en í hæsta Hnefa í 418 m mældri hæð með vindinn beint í fang og snjófjúkið beint í andlit áður en skóflast var niður gegnum misdjúpan og misþykkan snjóinn... bókstaflega rekin af fjalli með vindi sem var eiginlega ekki síður minni þó niður væri komið... alls 6,0 km á 2:14 klst... hvílíkur hópur...

... sem sýndi vel úr hverju hann er gerður og þjáppaði sér bara enn betur saman gegn rokinu og fjúkinu á tindinum ti að syngja afmælissönginn fyrir þá félaga sem áttu afmæli þann 4. des (Ketill, 74ra ára) og 8. des (Björn 72ja ára).

Þjálfari hélt smá tölu um langtímaframtíðarsýn Toppfara sem fæli að minnsta kosti í sér tvö markmið; að ganga með þessum mönnum þegar þeir ná hundrað árum... þ.e.a.s. ef við hin höfum heilsu til sögðu gárungar ;-)... og vesgú síðara markmiðið að ná því sjálf að verða 70 ára og vera enn að ganga á erfiðustu fjöll landsins líkt og þeir... að ekki sé talað um að sigra Kilimanjaro eins og Björn gerði á 70 ára afmælisári sínu 2009 eða hlaupa maraþon eins og Ketill gerði á sínu afmælisári 2007...

Haf þökk kæru heiðursmenn fyrir að vera dýrmæt fyrirmynd okkur öllum í Toppförum og öðrum
og ekki síður fyrir að vera okkur kærir félagar og vinir í blíðu og stríðu á fjöllum sem annars staðar ;-)
 

Snjóspuni undir tungli og stjörnu
á Þverfelli og Langahrygg Esjunnar

Farnar voru nýjar slóðir á Esjunni þriðjudaginn 6. desember þegar 33 manns voru mætt á æfingu í stilltu veðri... undir tungli og stakri stjörnu... og ferskum snjó... svo þjálfarar stóðust ekki mátið að taka snjóspuna kvöldsins alla leið...

Gengið var upp með Þverfelli og eftir suðurbrúnum þess að Búa við Gljúfurdal með brölti upp og og niður gil og snjóbrekkur...
og snúið við yfir á Langahrygg og niður með honum til baka um Fálkakletta að bílunum...

Birtugjafar kvöldsins voru snjórinn, tunglið, stök stjarna á himni, borgarljósin og friðarsúlan...
fyrir utan höfðuljósin sem margir slökktu á megnið af göngunni til að njóta umhverfisins enn betur...

Kyrrðin var áþreifanleg þetta kvöld og skilaði sér í værð yfir göngumönnum sem nutu æfingunnar út í yztu æsar... æfingu sem endaði á tæpum þremur klukkustundum eftir 5,8 km göngu upp í 485 m hæð á brúðkaupsafmælishól Siggu Rósu og Rikka með 597 m hækkun alls enda heilmikið um hóla og hæðir á leiðinni...

Gönguleið kvöldsins gul vinstra megin,
hefðbundin leið upp og niður Esjuna að Steininum svört í miðjunni
og gangan okkar í haust upp Rauðhól og Geithól rauð hægra megin...
...svona til að allir átti sig á göngusvæði kvöldins í samhengi við aðrar aðrar göngur okkar frá bílastæðinu við Mógilsá :-)

Elsku Ágúst R., Ágústa, Árni E., Áslaug, Elsa Þ., Eyþór, Finnbogi, Guðmundur jón, Guðjón, Gunnar Viðar, Gunnar Kr., Gunnhildur, Gylfi, Halldóra Á., Hólmfríður, hrafnkell, Jóhanna fríða, Katrín Kj., Lilja Kr., Lilja Seselja, María E., María S., Ólafur, Óskar Wild, Roar, Stefán A., Súsanna, Svala, Sylvía og Willi...

Takk fyrir dásamlega útiveru með ykkur yndislega fólk ;-)
 

Með leiðum fegurstum
á Grímmannsfelli um Katlagil og Hjálm

Hildur Ríkharðs og Gerður Jens í evrópskum skógarlundinum við fjallsrætur.

Þriðjudaginn 18. október fóru 41 Toppfari í sína tvöhundruðustuogfyrstu æfingu á gamalkunnugt fjall í Helgadal Mosfellssveitarinnar í kristaltæru veðri og fögru umhverfi. Þjálfarar völdu nýja leið að sinni sem þeir höfðu lengi haft augastað á og stefndu á næst hæsta tind þessa víðfeðma fjalls, Hjálm í suðvestri, sem eingöngu einu sinni hefur verið genginn áður í þessum klúbbi til samanburðar við einar fimm göngur upp á hæsta tind þess í norðausturhluta fjallsins sem mælst hefur um 490 m hár (fórum reyndar einu sinni ekki alveg alla leið, einmitt vegna þess hve langt er þarna upp eftir!).

Gengið var gegnum bæjarhlaðið á bústaðnum sem Laugalækjarskóli (Laugarnesskóli?) hefur til umráða í Helgadal og alið hefur margt útivistarbarnið gegnum tíðina... og áfram meðfram ánni upp með töfrandi fögrum fossum Katlagils...

Einstaklega falleg leið og í hróplegu ósamræmi við kynningu þjálfara á fyrri reynslu hópsins af fjallinu upp á hæsta tind enda höfum við hingað til gengið niður með Katlagili ofan af Stórhól í norðaustri og dáðst að því í lok ferðar, gjarnan í rökkri og óþolinmæði yfir að komast í bílana eftir drjúga göngu eða komið að því ofar og ekki farið um tæpistiguna í mesta gljúfrinu... en þarna fengum við Katlagilið beint í fangið frá fyrsta hamri áður en rökkrið tók yfir og nutum hvers skrefs upp úr mildu haustinu á láglendinu og upp í veturinn sem læsti klónum sínum í ísfossana innst í dalnum...

Þjálfurum datt í hug í bríeriinu yfir góða veðrinu, blankalogninu og léttskýjunum, að taka efsta tind Grímmannsfells í leiðinni en féllu frá því innst í dalnum þar sem þá voru enn rúmir 1,3 km í hann í beinni línu og tæpur kílómetri í hæsta tind á Hjálmi...

Sjá mynd neðar af slóð hópsins þetta kvöld þar sem vel sést hve langt var enn í hæsta tind í samanburði við heildarvegalengd kvöldsins. Viðbótin sú hefði verið tæpir 3 km á 1+ klst... en í staðinn teygðum við gönguleiðina eins og hægt var með því að þræða okkur eftir brúnunum í suðri og það var alveg nógu stór skammtur þetta kvöld.

Mættir voru:

Efri: Hjölli, Óli, Gunnhildur, Örn, Alma, Torfi, Rósa, Jón Atli, Nonni, Leifur, Ágúst, Stefán,  Helgi, Sylvía, Valgerður, Ósk, Irma, Guðmundur Jón, Áslaug, Björn, Eyþór, Brynja, Steinunn, Jóhanna Karlotta og Kjartan.
Neðri: Roar, Halldóra Á., Gylfi Þór, Lilja Sesselja, Súsanna, Sigga Sig., Wilhelm, Sjoi, Gerður, Ágústa, Ástríður, Hildur R., Jóhanna Fríða, Gunnar Viðar og María E. en Bára tók mynd og Dimma, Día, Drífa, Skuggi? og Þula stríddu Hjölla meðan á myndatöku stóð ;-)

Dívurnar Día, Drífa, Áslaug og Jóhanna Karlotta að stikla yfir rfrosisnn lækinn efst í Katlagili.

Þegar snúið var úr gilinu upp á Hjálm í suðri var farið að rökkva og ljósin fljótlega komin í notkun en útsýnið naut sín vel þegar upp var komið með glitrandi borg og bæi allt um kring enda Hjálmur frábær útsýnisstaður... sérstaklega ofan af seinni tindinum en báðir hæstu mældust jafnháir í gps-tækjum þjálfara og sá fyrri merktur Hjálmur á korti en sá síðari er hjálmlegri.

Sylvía, Roar, Ósk og Sigga Sig að sigra eina af aðalhindrunum á Grímmannsfelli... girðingar.

Bakaleiðin var svo beint niður í talsverðum bratta til að byrja með en svo mýkra um graslendurnar niður að ánni og yfir hana á stiklum í myrkrinu og undir tvær girðingar eða fleiri gegnum skóginn í bílana og tókst seinni hópnum ekki að villast þrátt fyrir miklar tilraunir ;-)

Skógur, gljúfur, tæpistigur, laxafossar, ísfossar, stjörnubirta, snjóföl, steinastikl og óvissuferð gegnum skóg í myrkri.... það var óskiljanlegt hvernig þjálfari gat talað svona um fjall sem bauð upp á þvílíkt ævintýri sem þetta... já, hvert orð skal tekið til baka!

Við fundum frábæra leið á Skálafell í vor og hlökkum til að fara þá leið aftur... loksins fórum við leið upp á Grímmannsfell sem togar aftur í mann (verðum líka að prófa okkur upp með norðausturhlíðum framhjá Helgufossi einn daginn)... Þetta lofar góðu fyrir betri leið upp á blessað Ármannsfellið sem þjálfara grunar að bíði hópsins austan megin þar sem þeir hafa gjarnan mænt upp eftir frá Mjóafellunum... það er ráð að hætta að tala svona illa um fjöll sem eiga greinilega bara eftir að sýna okkur sínar fegurstu hliðar ;-)

Gps-slóðin þetta kvöld og aðrir gps-punktar úr fyrri ferðum

Sjá drjúga fjarlægðina milli hæsta tinds hægra megin á mynd frá staðnum þar sem við lögðum alltaf bílunum vinstra megin ofarlega á mynd, en þetta var eini staðurinn þar sem okkur fannst við geta lagt mörgum bílum hér áður fyrr... þar til við gengum á lagið og þorðum að leggja bílaflotanum í vegakantinn eins og núna í kvöld... eftir að malarstæðið breyttist í veg upp að bústað sem þarna reis síðar... uppgönguleiðir Grímmannsfells hafa alltaf verið varðaðar alls kyns girðingum og skurðum og engum stöðum til að leggja bílum... þetta var með besta móti í kvöld ;-)

Dýrindis kvöldganga

...upp á alls 6,4 km á 2:19 - 2:30 upp í 462 m hæð með 375 m hækkun miðað við 104 m upphafshæð.

Hekla á laugardaginn eða Bláfjallahryggur...?
Við förum allavega á fjall ef mögulegt er vegna veðurs... hvað sem það heitir !

Endilega sendið allar athugasemdir/hugmyndir/tillögur/vangaveltur um dagskrána 2012 á þjálfara!
við viljum dagskrá að skapi klúbbmelima !... og
Sendið þjálfara ykkar val á utanlandsferð 2012 og næstu árin!