Kristaltær Hrútaborg
í 360 gráðu fjallakransi Snæfellsness

Veðurspáin var mjög góð laugardaginn 26. október og Örninn ákvað að blása til aukatindferðar þann dag
þó Báran kæmist ekki með þar sem hún var á bakvakt þessa helgi...
bakvakt sem hún skipti frá helginni á undan til að komast að Rauðufossum...

Og veðurspáin rættist aldeilis... heiðskírt, sól og frost... og gola á tindinum...
fullkomið vetrarveður eins og þau gerast tærust...

Frábær mæting... 14 manns ákváðu að grípa þetta veður... þar af fimm sem einnig voru í blóðrauðu ferðinni að Rauðufossum
helgina á undan... þau Arna og Njáll, Jórunn Ósk, Ólafur Vignir og Örn...

Frostið búið að læsa klónum í allt þennan dag...
 en svo hlýnaði reyndar eftir þessa helgi og einmuna veðurblíðan  sem ríkt hefur síðan í vor
var enn við lýði fram í nóvembermánuð...

Hrútaborg er glæsilegur tindur... einn af mörgum svipmiklum fjöllum Snæfellsness
sem stela senunni þegar keyrt er framhjá þeim...
og alger nauðsyn öllum þeim sem á annað borð ganga á fjöll að kynnast henni í návígi...

Hafursfellið, Tvíhnúkar, Snjófjall, Svartitindur, Skyrtunna og Hestur blasa við í vestri
þegar gengið er á Hrútaborg og Tröllakirkju í Kolbeinsstaðafjalli...
allt fjöll sem við höfum gengið á... þar af tvisvar á Hafursfellið... í annað sinn í vor á þessu ári í frábærri ferð...

Fjallshryggurinn norðan megin við Hrútaborg er enn ógenginn í klúbbnum...
Heggstaðamúli, Hrossaköst, Hróbjargastaðafjall og Sóleyjartindur - sá síðarnefndi reyndar nafngift þjálfara
undan Sóleyjardal sem er neðan við nafnlausan tindinn þar næst Hrútaborginni...
treginn við að kenna fjöll við konur er hluti af gamla tímanum og ráð að grípa tækifærin þegar þau gefast
til að koma kvenkynsnöfnum að ef slíkt er sársaukalaust af hálfu heimamanna og allra viðkomandi...
... þó þetta sé reyndra nafn á blómi... en það er allavega kvenkyns ! :-)

Þessi ofangreindu gullfallegu nöfn ein og sér gefa góða ástæðu til að ganga þennan fjallshrygg einn daginn...
gerum það í bríeríi í einum veðurglugganum þegar við viljum fara á nýjar slóðir :-)

Kaflinn frá veginum upp að Hrútaborg er um graslendur og mosa neðar gegnum gil og ása
og svo tekur grjótið við ofar og skriðurnar utan í fjallinu...

Krúnaður tindurinn og sérlega formfagur... og ókleifur að sjá vestan megin...
en ágætis leið hinum megin að austan...

Í nóvember árið 2012 fórum við í fyrsta sinn á Hrútaborg og þá fannst okkur ekki nægja að fara eingöngu þessa stuttu leið á þennan "einfalda" tind og tókum tindana sunnan megin við Hrútaborgina sem rísa milli hennar og Tröllakirkju í Kolbeinsstaðafjalli en menn taka gjarnan báða þá tinda saman, Hrútaborg og Tröllakirkju, sem við gerðum ekki en er auðvitað góð hugmynd...

http://www.fjallgongur.is/tindur87_hrutaborg_ofl_111112.htm

Ferðin sú yfir á þessa tinda hér nær... óþekktu tindarnir í Kolbeinsstaðafjalli í skugganum af Tröllakirkju...
reyndist söguleg og ansi krefjandi í bröttu klöngri svo Hrútaborgin bliknaði í samanburði...
mögnuð ferð og ein af mörgum perlum í minningunni...
svo upp á það að gera þá var ágætt að við fórum á þá en ekki kirkjuna
því líklega hefðum við aldrei annars kynnst þeim...

Það er einstakt að ganga á veturna...
upplifa dagrenninguna og áhrifamátt sólarinnar þegar hún nær loksins að slá geislum sínum á landið sem gengið er um
og á okkur hrímkalda göngumennina...
hlýjan, birtan og sjálfur yfirstíganleikurinn sem fylgir sólinni er ótrúlega áþreifanleg upplifun á þessum stundum...
en einmitt þetta og fleira til veldur því að við höldum mest upp á veturinn af öllum árstíðum á fjöllum...

Tröllakirkjan lengst til vinstri hér...
gangan okkar á hana var farin í október árið 2013 og er með þeim allra bröttustu í sögunni...
hálf lygilegt að hafa náð að fara þarna upp í vetrarfæri...

http://www.fjallgongur.is/tindur98_trollak_kolbeins_051013.htm

Tært og svo fögur sýn í allar áttir á þessum slóðum... magnaður útsýnisstaður..

Komin á suðurhlið Hrútaborgar og Tröllakirkja blasir við fjærst bröttust...

Nær eru Steinahlíð, Fögruhlíðarhnúkur, Vatnsdalshnúkur og svo Hrafnatindar neðar út af mynd...

Hliðarhallinn bak við Hrútaborgina austan megin er ágætlega mikill á köflum en sleppur vel ef færið er gott
eins og þennan dag í mjúku snjófærinu...

Ógnarfagur er hann svo dalurinn milli Kolbeinsstaðafjalls og Fagraskógarfjalls...

Klöngrið upp á Hrútaborgina reynir ágætlega á en er vel fært og örugg leið alla leið upp...

"I love it" ... er það fyrsta sem manni dettur í hug þegar maður horfir á gleðina hjá Ólafi Vigni
sem er einn af ötulustu göngumönnum klúbbsins og gleðin alltaf við völd á þeim bænum :-)

Allir með keðjubrodda og færið mjúkt og meðfærilegt...

...  svolítið meira ísað færið þarna í nóvember árið 2012...

En samt komust allir upp þá við góðan leik... Guðmundur Jón og Katrín í þeirri ferð
og Katrín því að ganga á Hrútaborg í annað sinn eins og Örn þjálfari...

... og Guðmundur Jón í þriðja sinn því hann fór einnig á Hrútaborgina sumarið 2018 með Inga
sem bauð upp á það fjall sem þriðjudagsæfingu 27. júlí 2018 í sumarfríi þjálfara...
en þeir mættu bara þrír þá; Ingi, Bjarni og Guðmundur Jón... geri aðrir betur... :-)

...jú strákarnir hefðu nú mátt gera betur í einu...
að taka fleiri ljósmyndir í þessari þriðjudagsgöngu ! :-) :-) :-)

Já... fínt færi... sérstaklega miðað við nóvember 2012...
en samt það bratt að hundurinn Gormur sem hefur strax tekist að heilla okkur upp úr skónum síðustu vikurnar
komst þetta ekki enda sérlega lágfættur og ekki orðinn mikill reynslubolti í fjallaklöngri
svo Jórunn varð að snúa við með hann og missti hún því af toppnum því miður...

Þarna reyndi á að hafa ekki þjálfara líka aftastan... kannski hefði þetta tekist með samhentri þrjóskunni þá...
enda betra að þjálfarar séu báðir þegar svona krefjandi eða flóknir kaflar koma í göngum eins og þessi snarbratta brekka er
og ekki allir jafn vanir þessu klöngri...

Komin upp mesta brattann en þessi kafli var fínasta æfing í brölti í bratta...
því meira sem við gerum af því... því betri verðum við...

Við höfum gagngert reynt að hafa sem mest klöngur í þriðjudagsgöngunum í gegnum tíðina
en með léttari göngum annan hvern þriðjudag hefur heilmikið dregið úr því...
verðum að passa að þjálfa þetta vel og halda vel við... þessu öryggi í klöngri í bratta...

Uppi á Hrútaborg blasir einstakt útsýni við úr ekki meiri hæð en 824 metrum...
... til suðurs að Kolbeinsstaðafjalli með tindunum sínum öllum og Tröllakirkjunni trónandi þar efst...

http://www.fjallgongur.is/tindur98_trollak_kolbeins_051013.htm

... og til vesturs að Hafursfelli... hinus svipmikla og margbrota fjalli  sem við höfum tvisvar gengið á:
http://www.fjallgongur.is/tindur84_hafursfell_220912.htm
http://www.fjallgongur.is/tindur169_hafursfell_130419.htm

... Tvíhnúkum, sem við erum alltaf á leiðinni að gangan á...

... Svartatindi, Snjófjalli og Skyrtunnu sem við gengum á í mjög fallegri en krefjandi ferð:
http://www.fjallgongur.is/tindur92_skyrtunna_ofl_010513.htm

... og loks fjallinu Hesti sem er sérkennilegt í lögun og gaf okkur eina fegurstu gönguna í sögunni:
http://www.fjallgongur.is/tindur127_hestur_030416.htm

Nýliðar ársins eru sumir mjög duglegir að mæta... annað hvort í tindferðirnar eða bæði þær og þriðjudagsgöngurnar...
og svo eru nokkrir sem hafa lítið sem ekkert mætt frá því fyrstu mánuði ársins sem er mikil synd...
því svona dagar eru veisla eins og svo margar aðrar dagsferðirnar á þessu ári..

Útsýnið til norðurs... á fjallshrygginn sem við eigum eftir að fara á... fyrrnefndan Heggstaðamúla og félaga...

Og norðaustan blasti svo Tröllakirkja í Hítardal við en á hana höfum við farið þrisvar
og tvisvar um Smjörhnúkana sem eru einir fegurstu tindar landsins...

Núna síðast:http://www.fjallgongur.is/tindur143_smjorhn_trollak_hitard_030617.htm

Þar á undan: http://www.fjallgongur.is/tindur62_smjor_trollak_hit_060811.htm

Fyrsta ferðin en þá var Smjörhnúkum sleppt og Jón Gauti Jónsson var fararstjóri:
http://www.fjallgongur.is/tindur16_trollakirkja_hit_111008.htm

Fagraskógarfjall hér vinstra megin... sem við eigum enn eftir... en Ísleifur Toppfari gekk einsamall á það í sumar
sem hluta af áskorun þjálfara um að ná 12 fjöllum eða gönguleiðum einn á ferð á nýjum slóðum
og er mikill fengur af ferðalýsingum þeirra sem taka þátt í þessari áskorun en þau eru eingöngu fimm:

http://fjallgongur.is/askoranir_allar_fra_upphafi/okunnar_slodir_2019.htm

Já.... gullfallegur útsýnisstaður í allar áttir...

Menn nutu lífsins á fjallstindi þessarar borgar hrútanna...

Heilun... hugleiðsla... friður... slökun... orkuhleðsla...

Helga Björk kann þetta alla leið...

Allir útsýnisstaðirnir skoðaðir og rýnt í fjöllin...

Hópmynd á tindinum til austnorðausturs...

Biggir, Batman Helga Björk, Björn H., Bestla, Arngrímur, Katrín Kj., Guðmundur Jón, Björgólfur,Skuggi, Ágústa, Arna, Ólafur Vignir, Njáll
og Örn tók mynd en á mynd vantar Jórunni Ósk sem sneri fyrr við með Gorm.

Það var ráð að taka líka hópmynd með útsýnið til suðurs...

Með Tröllakirkju og Kolbeinsstaðafjall í baksýn:

Björn H., Bestla, Arngrímur, Helga Björk, Biggir, Njáll, Arna, Ólafur Vignir, Ágústa, Guðmundur Jón, Katrín Kj,  og Björgólfur
en Örn tók mynd.

Mynd frá Arngrími eðalljósmyndara í svarthvítu :-)

Kyngimagnaðar myndirnar hans Arngríms... við eigum nokkrar ómetanlegar af Batman...

Þar sem golan næddi um tindinn var farið áleiðis niður gilið góða til að ná skjóli fyrir nestispásu...
þeirri einu í göngunni enda innan við 10 km löng ganga...

... enn og aftur borðandi á fjalli í stórkostlegum fjallasal... þessir nestisstaðir skáka flottustu veitingastöðum heims
og valda því líklega að þjálfarar og hugsanlega fleiri Toppfarar fara ekki eins oft út að borða en ella...
heldur heim eftir svona göngu og njóta þess að borða sársvangir eftir erfiðið við kertaljós í hlýrri stofunni sinni...

Kalt jú... en stórfenglegt landslag í fanginu... friður... fegurð og samvera í hæsta gæðaflokki...

Smá gola líka hér og því komu þessir klettar sér vel...

Niðurleiðin gekk vel og keðjubroddarnir fyrirtaks græjur á þessum kafla...
hér hefðu ísbroddarnir verið verri kostur...

Hrikalegt landslag Hrútaborgar nýtur sín vel á þessu kafla...

... hinum glæsilega hliðarhalla austan megin...

Í ferðinni árið 2012 voru þrír höfðingjar Toppfara... Björn Matt., Katrín Kj. og Guðmundur Jón...
afreksfólk sem erfitt verður að feta í fótsporin á...

Stórkostleg fegurðin á þessum stað svona hrímuðum árið 2012...

... eins og árið 2019...
stórbrotið landslagið og göngumennirnir svo smáir hægra megin undir klettunum á myndinni...

Niður var farið rösklega og menn í sæluvímu með gullfallegan dag
og mun sólríkari og bjartari en árið 2012...

... og styttri og léttari þar sem nú var bara farið til baka í bílana og enginn þvælingur yfir á aðra tinda...

Fínn dagsskammtur og allir fegnir að komast í bæinn á skikkanlegum tíma
eða þeim hinum sama og vikuna á undan frá Rauðufossum...
kl. 16:30 :-) 

Tröllakirkjan og hinir tindarnir í Kolbeinsstaðafjalli... hrikalega fallegt landslag...

Formfegurð Hrútaborgar er óumdeild og þess virði að fara á þennan tind oftar en einu sinni og oftar en tvisvar...

Hey ! Er ekki leið þarna upp geilina vinstra megn við hæstu klettana ?
... svei mér þá...

Lendurnar krefjandi yfirferðar á uppleið og niðurleið...

Sólin enn hátt á lofti síðasta kaflann... yndislegt... 
menn nutu þess að hafa nægan tíma og þurfa ekkert að stressa sig á vegalengd né tímalengd...

Það lengdist talsvert úr hópnum á niðurleið...
Örn og Björn Hermanns fóru fremstir niður og svo komu menn hver á sínum hraða síðasta kaflann...

Sjá hér göngumennina koma niður ofan við gilið...

Alls 9,5 km á 4:32 klst. upp í 824 m hæð með 801 m hækkun úr 91 m upphafshæð.

Selvogsgatan er svo nóvembertindferðin næstu helgi... það þýðir þrjár tindferðir í röð viku eftir viku...
og fjórar ef Hvalfell næst svo helgina þar á eftir 9/11... það hefur aldrei gerst áður í sögu Toppfara...
alltaf eitthvað nýtt í þessu klúbbi :-)
... já, meðan menn nenna og drífa sig út og æfa ekki afsakanir þá gerast ævintýri og töfrar... :-) :-)