Tindur 59 - Hrafnabjörg - Tröllatindar - Þjófahnúkur 21. maí 2011

 


Klettaklöngur um Hrafnabjörg
Tröllatinda og Þjófahnúk
Í brakandi vorblíðu og tæru útsýni


Gengið á Hrafnabjörgum með Þórisjökul, Skjaldbreið, Tindaskaga, Tröllatinda, Hlöðufelli og Skriðu í baksýn.

Hún var notaleg og afslöppuð tindferðin þann 21. maí þegar 18 Toppfarar tóku fimm tinda göngu "baksviðs" (e.backstage!)
á
Þingvöllum í fallegu vorveðri og óskertu útsýni allan hringinn þar sem klöngrast var upp og niður fimm tinda.


Glittir í hlíðar Hrafnabjarga vinstra megin, Tröllatindarnir þrír, Tindaskagi og Þjófahnúkur.

Lagt var af stað frá vörðu vélsleðamanna, Bragabót vestan megin Hrútafjalla og Kálfstinda og blés vindurinn þarna napurt til að byrja með eftir norðangarrann sem ríkt hefur á landinu síðustu daga og olli snjókomu á Vestfjörðum, Norðurlandi og Norð-Austurlandi... en þessi vindur þagnaði er leið á morgunin svo eftir sat lognið með okkur það sem eftir lifði dags.

Uppgangan á Hrafnabjörg var létt og laggóð með óskertu útsýni suður til sjávar, Þingvalla, Hengilsvæðisins
 og allan hringinn þegar ofar dró.

Elsa Inga, Áslaug, Irma og Brynja með Hrútafjöll nær og Flosatind í Kálfstindum hæstan fjær...
...tindinn sem við klifum í magnaðri ferð á brattri og hálri leið á Kálfstinda 1. maí í fyrra
.

Veislan var 360 gráður uppi á Hrafnabjörgum...
Esjufjallgarðurinn hér, Búrfell á Þingvöllum í hvarfi fyrir vörðunni og Botnssúlur bak við Helgu.

Nöpur golan enn við völd en fjaraði svo úti þarna á Hrafnabjörgum þegar við gengum norður að brúnunum við Tröllatinda.

Það er ekki hægt að vera í slæmum félagsskap á fjöllum...

Átján Toppfarar með
Oki, Fanntófelli, Þórisjökli, Skjaldbreið og Tindaskaga...

Elsa Inga, Óli, Dóra, Día, Áslaug, Hildur Vals, Björn, Arnar, Irma, Örn, Helga Bj., Kjartan, Guðrún Helga, Lilja Sesselja, Brynja, Steinunn, Anton, Guðmundur K., og Jóhann en Bára tók mynd
og Dimma og Von gættu hagsmuna hópsins meðan á myndatöku stóð...

Þvílík veisla... góðar fréttir af Hnúksförum, Þeim Óskari og Skúla Wildboys með fjallgönguklúbbnum sínum Fjallahress og Hrútsfjallstindaförum, þeim Nonna og Ástu Henriks og við vorum reglulega með hugann á Vatnajökli...
alveg grunlaus um hamfarirnar sem þar voru í aðsigi síðar um daginn...
 http://mbl.is/frettir/innlent/2011/05/21/horfdi_a_bolsturinn_koma_upp/

Víðáttan víðfeðm og einstakt að fá óskert útsýni til jöklanna í norðri.

Tröllatindarnir hér í fangi göngumanna fremst á mynd...
Ósköp saklausir og litlir svona ofan af
Hrafnabjörgum en brattir og illkleifir tveir þeirra
og átti Tröllkarlinn eftir að skella mönnum skelk í bringu...


Kvígindisfell, Fanntófell og Oköxl vinstra megin.

Austurbrúnir Hrafnabjarga eru ókleifar en svipmiklar þegar gengið er fram á þær
og við nutum veðurblíðunnar sem nú tók öll völd dagsins.

Góð leið niður norðaustan megin og sólin bakaði bergið í vorhitanum...

Eftir Hrafnabjörg biðu Tröllatindarnir uppgöngu...

...móbergsslegnir, lausir í sér og brattir...

Fyrri nestistími dagsins við fótaskör Tröllkarlsins...

Besta veðrið í matarpásu það sem af er árinu...
Við sátum bara og slökuðum vel á ...jú, verðum við ekki að halda áfram... þó þetta væri ósköp notalegt...

Þjálfarar fundu góða leið upp í könnunarleiðangri þann 4. maí í mun meira vetrarfæri en þennan dag 21.dag  sama mánaðar... en í nestistímanum leitaði Örn að skemmtilegri leið þó brattari væri með rimanum sem liggur úr klettinum til suðurs...

Jú fært en ansi bratt og laust í sér og ekki á færi allra í klúbbnum... 

En í þessum leiðangri voru bara mættir þeir sem ætluðu sér alla tindana og létu sig hafa það
skjálfandi á köflum með aðstoð í grennd...

Meðal annars Hildur Vals og Lilja Sesselja sem eru með reyndustu konum Toppfara
og hafa farið í flestar af
erfiðustu ferðum klúbbsins, enda getur ekkert slegið þær út af laginu... 

Þeir sem fyrst fóru upp hjálpuðu hinum neðar... eða tóku myndir og lofuðu bót og betri tímum þarna uppi...

Sjá mergjaða mynd Kjartans á fésbókinni sem hann er að taka á þessari mynd:
http://www.facebook.com/permalink.php?story_fbid=1723681056645&id=1376913439#!/photo.php?fbid=2044737288005&set=a.2044727367757.124781.1531581867&type=1&theater

Anton var bjargvætturinn á versta karlanum...

Riminn rúmaði eiginlega bara einn í einu til að byrja með...

...og við klöngruðumst áfram í eftirskjálftunum eftir móbergsvegginn...

Og allt gekk framar vonum enda ósérhlífinn hópur á ferð...

Þetta skánaði á "meginlandinu" ofar sem breikkaði og gaf betra ráðrúm m. a. til að nota stafina...

... í greiðfærum en lausum móbergsklöppunum...

Tindurinn á Tröllapabba eins og kvenþjálfarinn skírði hann... Tröllkarlinn eiginlega betra orð þar sem Anton kallaði Tröllamömmuna Tröllskessu... já, það var betur við hæfi þessara hrjúfu og harðneskjulegu tinda...

Vinkonurnar Steinunn og Brynja... Dóra hans Nonna Hrútsfjalls ;-)... Anton - já, hvar var eiginlega Hjölli?... Irma og Helga...
jú og
Von, fjallagarpur sem gefur foryztuskvísunum Dimmu og Díu ekkert eftir...

Það voru líka bara hörkutól úr röðum ferfætlinga klúbbsins í þessari ferð en Von var sú eina sem klöngraðist upp Tröllkarlinn án vandræða, Dimma rúllaði niður í grjóthruni og Día lét ekki plata sig út í þessa vitleysu,
svo þær stöllur fundu sína leið hvor upp á skárri stað austan megin...


Hrútafjöll og Kálfstindar í baksýn

Niður var farið bratta skriðu norðan megin sem var skemmtilegra en að fara niður austan megin eins og þjálfarar ætluðu sér eftir könnunarleiðangur fyrr í maí, en þessi var fín a la Anton enda hafði snjóa vel leyst fram eftir mánuðinum...

Hálkan hverfandi nema rétt efst og Kjartan gætti félaganna á þeim hálkubletti til síðasta manns...

Sá var brattur, þessi Tröllkarl...

En ósköp saklaust séð neðan frá... eins og oft á fjöllum þar sem sjónrhornið segir ólíkt til um færi...

Niðri bakaði hitinn okkur eftir svitabaðið við bröltið og við fækkuðum fötum...

Fremra og Innra Mjóafell í baksýn vinstra megin en þar þræddum við okkur um síðasta sumar
og horfðum þá til
Hrafnabjarga og Tröllatinda og ráðgerðum þessa göngu sem nú varð að veruleika...

Tröllabarnið litla var ósköp saklaust á einfaldri leið upp í 619 m hæð...

Ofan af því sást vel til Tröllskessunnar sem var síðasti Tröllatindur dagsins...
Bratti hennar og áferð í stíl við
Tröllkarlinn en öllu mýkri þó og fíngerðari eins og kvenna er lagið ;-)

Helga, Örn, Brynja, Kjartan, Áslaug og Dóra með Botnssúlur og Ármannsfel i baksýn ofan af barnslegum tindinum...

Elsa Inga, Irma, Hildur Vals. og Helga Björns með Búrfell í Þingvallasveit í baksýn og hluta Hrafnabjarga og Tröllkarlsins vinstra megin á mynd... og jú, Syðstu Súlu Botnssúlna lengst til hægri ef maður gefur aðeins gaum...

Greiðfært ofan af óhörðnuðu Tröllabarninu og hæsti tindur Kálfstinda - nafnlaus - í baksýn undan Hrútafjöllum...
þjálfarar þegar búnir að setja
nyrðri Kálfstinda á dagskrá árið 2012...

Landslagið er oft ansi stílhreint og taktfast í mynstrum, litum og áferð...

Sumarið sigraði sannarlega í þessari ferð... snjórinn mátti sín einskis þó hann væri dreifður um allt... sólin og hitinn bakaði jörðina svo allt ilmaði og maður andaði hreinlega lyktina af sumrinu að sér...

Tröllskessan framundan um rimann á sama hátt og á Tröllkarlinum en þessi var greiðfærari
og ólíkt betri uppáferðar sögðu menn... ;-)

Fínasta klöngur þar sem hendur voru óspart notaðar til stuðnings og stafirnir lítið nýttir í þessari ferð...

Lengra var ekki farið með hópinn þó Örn og strákarnir strákarnir fyndu betri leið alla leið en þjálfarar höfðu fundið fyrr í mánuðinum... en samt ekki nógu örugga fyrir heilan hóp að fara eftir bröltið á Tröllkarlinum sem reif verulega í svo við létum 593 m hæð nægja...

Óli, Hildur vals og Steinunn með norðurhlíðar Hrafnabjarga vinstra megin og fjallgarð Esjunnar í fjarska...

Niður var klöngrast í leit að skjólbetri stað fyrir allan hópinn...

Því Tröllskessan tók ekki annað í mál en að við kíktum inn í kaffi...

Þar sem spjallað var yfir kakóbollanum um framtíðargöngur í Skaftafelli sem bíða okkar í óendanlega
árlegum maíferðum á
Vatnajökul...

Úr því tindi Tröllskessunnar var ekki náð fórum við með lendum hennar til norðvesturs...

 ...af því klifurkettirnir voru ekki búnir að fá nóg af klöngri...

Nyrsti hluti Tröllatinda með Þórisjökul, Skjaldbreið, Tindskaga og Skriðu í baksýn.

Við klöngruðumst niður norðuröxlina á Tröllskessunni áður en snúið var við til baka...

Í nánast hjartalaga snjóskaflinum varð manni hugsað til Ástu Henriks... sem kleif Hrútsfjallstinda á sömu augnablikum ásamt Nonna hennar Dóru... Jú, þau komust á tindinn eftir eingöngu 8 klst. uppgöngu eða tveimur klukkustundum fljótar en við fyrir tveimur vikum enda 8 manna hópur í einni línu og þá er lífið aðeins einfaldara á jökli... frábært að fá svona góðar fréttir af þeim á okkar göngu ;-)

Við áðum og spjölluðum í tíma og ótíma þennan dag... hvorki veður né tími rak á eftir okkur....
Þetta var
slakasta ganga ársins og við nutum hennar til hins ítrasta eftir barning vetrarins og harðneskju vorsins...

Skefilsfjöll í baksýn.. ein af sex tindahryggjum svæðisins sem við ætlum að bæta smám saman í safnið næstu árin...

Litið til baka á Tröllskessuna með Irmu og Lilju Sesselju á góðu "til-baka-spjalli"...

Þjófahnúkur var síðasti tindur dagsins og á þessu dóli var ekkert sjálfsagðara en að taka hann með...

Fínasta leið þarna upp...

Klöngrið orðið ósjálfrátt og fumlaust...

Snjórinn óðum að hverfa í vorsólinni og lítið frost í jörðu...

Björn með Tröllkarlinn í baksýn og glæsilegar Botnssúlurnar í fjarska og Ármannsfell í pilsfaldinum á þeim...

Mosinn er einn af bestu vinum Toppfara... sem mikilvægt er að fara mjúkum fótum um...

Þjófahnúkur mældist 703 m hár og gaf frábært útsýni til allra átta...
Það var nóg að gera þennan dag við að virða fyrir sér fjallasýnina...

Dimma lagði sig á Þjófahnúk eins og sönnum fjallagarpi sæmir þegar tækifæri gefst í fjallgöngferðum...
Hún lenti í honum kröppum á
Tröllkarlinum þegar hún rann niður í grjóthruni og hvekktist aðeins við það
en braggaðist fljótt enda öllu vön með félögum sínum á fjöllum...

Þjófahnúkur var greiðfær upp og niður...
Bílarnir í fjarska í suðri og þangað var síðasti áfangastaður dagsins að sinni...

Flosatindur i Kálfstindahryggnum gægist upp bak við Hrútafjöll...

Día gætti Áslaugar sinnar vel... og Dóru þar sem Drífa var í sveitinni þennan dag...

Þarna blés golan aðeins í fyrsta sinn frá því um morguninn...

En við gengum fljótlega niður í steikjandi hitann
og urðum að fækka fötum niðri á láglendinu í rúmlega 500 m hæð að bílunum...

Mosið og hraunið straujað síðustu kílómetrana og eldborgin gengin þarna í leiðinni...

Óli og Björn á eldborginni með Þjófahnúk í baksýn og Tröllatindana fjær vinstra megin.

Sprungið á dekki þjálfara þegar göngunni lauk...
Þetta var náttúrulega allt of léttur dagur til að enda svona átakalaust fyrir sig...
og Jóhann, Óli og Kjartan aðstoðuðu við að koma nýju gúmmíi undir kaggann, haf þökk fyrir strákar ;-)

Notalegur endir á þægilegri tindferð í fyrsta sumarveðrinu í ár... við tímdum ekki heim frekar en fyrri daginn og tókum góða hvíld í mosanum áður en lagt var af stað til byggða... sæl og slök eftir endurnærandi dag í óbyggðum sem gaf heilmikið klöngur og magnaða fjallasýn í fallegu veðri sem var ansi sumarlegt ;-) ... og endaði með ósköpum þar sem gos hófst í Grímsvötnum síðar um kvöldið og virtist þegar þetta er skrifað vera eitt það stærsta í Grímsfjalli á okkar tímum...
http://is.wikipedia.org/wiki/Eldgosaann%C3%A1ll_%C3%8Dslands



Þversnið af tindum dagsins:
Hrafnabjörg 780 m- Tröllakarl 626 m - Tröllabarn 619 m - Tröllskessa 593 m (ekki alla leið) og Þjófahnúkur 703 m. 

Alls 11,3 km (gps sýndu 10,2 -12,4 km) á 6:05 - 6:14 klst. upp í 780 - 626 - 619 - 593 - 703 m hæð
með
1.010 m hækkun alls milli tinda miðað við 535 m upphafshæð.

Sjá allar myndir þjálfara hér:
https://picasaweb.google.com/Toppfarar/T59HrafnabjorgTrollatindarJofahnukur210511#

Frábærar myndir félaganna á www.facebook.com

Og myndbönd þjálfara úr ferðinni hér:
 

 

 

Við erum á toppnum... hvar ert þú?
www.toppfarar.is


Toppfarar ehf - Viðarrima 52 - 112 Reykjavík - Kt: 581007-2210 - Sími: +354-867-4000 / -899-8185 / -588-5277 - Netfang: bara(hjá)toppfarar.is
Copyright: Höfundarréttur: Bára Agnes Ketilsdóttir